Karbi-Anglong nung prangpong-injang yangludak ka makdok; Nisung ana apu

Guwahati, July 07 (Agencies): Kaziranga National Park (KNP) nung arem shiruru khasetba azüoktsü atema Wildlife Crime Control Bureau telok ka den CRPF yaritepa mapa ka inyakdang, Brihostibar aonung prangpong-injang yangludak tesem ka makdokogo.
Karbi Anglong district nung Dokmoka police station kübok parnoki iba tesemji makdok aser nisung ana apu. Tenaji Jiten Loktah (55) aser Kon Rongpi (37) na lir, ta jangjaogo.
Iba tesem nungi danü mesükba shiruru ka indang teküp, single-barrel prangpong 2 aser iron pipe ka ngutet.
Iba tesem nung shiruru shibelener telok ka lir ta osang tejangja angazükba sülen mita ao, ta Wildlife Crime Control Bureau ajanga metetdaktsü.
“Onoki nisung ana apu aser osettsüset kar ngutetogo. Iba ajanga ozüng alema shiruru shibelenba mapa inyaker ta kuli sayur. Onoki maneni bushisüngdang südar,” ta ketdangser kati ashi.
Iba tesem ya Karbi Anglong arem min anasa lir aser tzümetsüng ajurudang iba tesem nung Kaziranga nungi shirurutem aika jenoker. Shiruru shibelenertem jagi tzüngluruba mapang shirurutem khasettsü tasa atong asütsü akok, ta ketdangserisa shisem.
Taküm tzümetsüng ajanga Kaziranga mobanga lir aser iba jagi shiruru aika Karbi Anglong len-a jenoker, ta KNP ketdangser kati ashi.
“Onoki tensa kanga junga reprangdar. Tzümetsüng mapang Karbi Anglong nung shirurutem jenokdang, shiruru shibelenertemi maongka tajung agir aser ibaji onoki kanga junga meteta lir. Kaziranga den medemdangra Karbi Anglong arem min nung security kanga tashimait lir,” ta paisa shisem.