Karbi bandh anema high court nung PIL ka benok

Guwahati, Rongjui (September) 3 (Agencies): Assam kübok Karbi-Anglong, Dima Haso aser West Karbi Anglong nung ghonda 24 mokdangtsü ayongzükba anema Asomiya Yuva Mancha nung Secretary General Jitul Deka-i Gauhati High Court nung PIL ka benokogo.
Karbi Students Association(KSA), Karbi Nimso Chingthur Asong (KNCA) aser Autonomous State Demand Committee (ASDC) telok nungi Tirtemi September 4 anepdang 5:00 ako nungi tenzüka ghonda 24 mokdangtsü ayongbaji Supreme Court aser Guwahati High Court-i ozüng agütsüba anema lir, ta Deka-i Public Interest Litigation (PIL) nung shia lir.
Mokdangba sentongtem ya ozüngi memelar aser iba linük nung shingaia mokdang ayongzüktsü temeten mali, kechiyong iba ya Supreme Court aser Gauhati High Court-i oshidang agütsüba anema lir, ta paisa ashi.
“Karbi Students Association(KSA), Karbi Nimso Chingthur Asong (KNCA) aser Autonomous State Demand Committee (ASDC) Tirtemi mokdang ayongba atema State sorkar nem sen crore pungugu agütsütsüla. Ibaji mokdang nung takoksa anguba atema menokba ama asütsü aser sen jagi Karbi Anglong, Dima Hasao aser tangalen teyari agütsütsü ta PIL nung shia lir” ta Advocate Amit Goyal-i osangbener dang ashi.
“Bandh’ mesüra ‘hartals’ alitsü ayongertem, rail aser rasta roko sentong nung shilem agirtem aser train, bus, tanga garitem aser sensotem dak teka sangshirtem aputsü, tepuokdak ayutsü aser ozüngi merenshitsü atema Jitul Deka-isa PIL nung takhangba agüja lir.