Kardashian’er kibong dang film nung shilem agitsü asüngdanger

London, May 27 (Agencies): Hollywood nung film yanglur telok tongti kati Kardashian’er kibong nem film nung shilem agitsü atema dollar sen million 100 agütsütsü onük benokba osang ka Female First-i metetdaktsüogo.
Kardashian’er kibong otsü nung ajemdaker yanglutsü renemba film nung Kardashian’er kibongisa shilem agitsü asoshi tan asüngdanger lir.
“Kardashian’er kibong otsü nung ajemdaker yangluba film-i rongsen tajangzük jenti bener arutsütsü tangatetba nung Kris Jenner; lar jalatem – Kourtney, Kim, Khloe, Kendell, Kylie; jabaso Rob aser taoba kinüngbo, Caitlyn Jenner nunger dang kasa film nung shilem agitsü asoshi asüngdangba osang jangjaogo,” ta kasa osang ajanga metetdaktsü.
“Hollywood nung tentetba tongti film yangluba telok kati Kardashian’er kibong züngsemtemi tongti shilem agia, Kardashian’er kibong otsü nung ajemdaker film ka yanglutsü sentong renemba osang ka kü dang metetdaktsüogo,” ta Kardashian taküm otsü zülutsüsang, Ian Halperin-ia osang jangjashitsüogo.
Suoshi, mobile apps aser reality television sentong, ‘Keeping Up With The Kardashian’ densema shishilembatsüren sabang nung tetsüng ajemoka aliba Kardashian’er kibong-ia television nung dang masü saka film nunga shilem agitsü jangraba osang ka angazükogo.
Aji oda, par kibongi film nung shilem agitsü onükji agizükra, Kardashian’er kibong film-ji US kübok Los Angeles aser New York yimti na nung yanglutsü sentong renema lir.