Kareena film nung mezüng shilem agidang ni arishi küm 15 liasü: Arjun Kapoor

March 11, 2016 : R. Balki-i direct asüba ‘Ki and Ka’ film nung actor Arjun Kapoor aser actress Kareena Kapoor Khan nati nüknürar shilem agitsü.
Arjun Kapoor-i, “‘Bajrangi Bhaijaan’ film nung shilem agila, Kareena-i film nung mezüngbuba shilem agidang ni arishi küm 15 tain liasü aser iba mapang ni class 10 nung zünga liasü,” ta ashi.
La film nung mezüng shilem magidang nungi ni ajurur liasü anungji ni la meteta lir. La dang tashi kecha memelenshi. Tanga ni la den akhi mapang asayatsüba ama kasa asayatsür,” ta Arjun-i ashi.
Kareena-i 2000 küm tangokba ‘Refugee’ film nung mezüng shilem agia liasü.
“La ya actor kanga dang tajung aser ibaji ajanga la den külemi shilem taginütsüka lir. Iba den külemi la den screen ka nung külemi nokdaktsüji jangratemtsü ka lir kechiba süra la onsara tajung. Lai noklang nung shilm 200 tashi junga shilem agitsü meranger aser kara kara yimya melenshiteter,” ta pai ashi.
‘Ki and Ka’ film nung Arjun ya IIT züngtemer Kia (Kareena) kinüngbo amai shilem agia lir. Kia ya kanga dang mapa nung temulung agütsüba tettsür ka adoker.
Kareena tena medemer kanga tajung asüba ajanga film nung apuani shilem kanga junga agitet, ta Arjun-i ashi.
“Film nung apuani shilem agitsü atema nai kanga junga meteta aliba actor ka den shilem agitsüla,” ta paisa ashi.
Iba romantic comedy film ya April ka nü sayatsü sentong lir.