Kareena Kapoor aser Saif Ali Khan na jabaso ka moaogo

December 20, 2016 (Agencies) : Kareena Kapoor aser Saif Ali Khan-na tebur ka moatsüogo. Kareena-i la asoshi mezüng tanur Mongulbar anepdang 7:30 ako meta Breach Candy Hospital, Mumbai nung aso.
Tetsü aser tanur junga dang lir aser tanur tenüng Taimur Ali Khan jatsüogo, ta osang ajanga ashi.
“Ozü tanur tebur ka asoba osang lemsateptsü asoshi kanga pelar; Taimur Ali Khan Pataudi, December 20, 2016. Osangbenertemi onok tang ita toku tashi angatetba aser yaritepba atema pelar, aser talisa maneni onok sapurtem aser temolungertemi maneni meimba atema kanga pelar. Nenok ajak dangi Christmas aser Küm tasen salem abener… With love, Saif aser Kareena” ta par kibongi osang sangdong.
Tepela agi sünger, tetsü tantsü Karishma Kapoor-i iba osang la indang Instagram nung sangdong.
“Taimur Ali Khan Pataudi alima tangi aruba pelashishia agizüker. Tetsü aser tanur junga lir. Tebu-a kanga junga lir!” ta Saif tenu Soha Ali Khan-i twitter nung zülu.
Kareena tanur asotsü mapang atongba ajanga, tawa ang lai teyi Karishma aser lar medemtsür Malaika aser Amrita Arora nunger den külemi Christmas jeli benjung among.
Saif mezüng Amrita Singh-den kibong küma liasü aser tena tanur ana lir- Sarah aser Ibrahim.
“Ozü Bebo tebur ka sogo!!!! Ni kanga pelar!!!! #TaimurAliKhan?????” ta Film yanglur, Karan Johar-i pa indang Twitter nung zülua lir.
“Kareena küna tsüngda tesentaktep tajung sayur. Tanur ka arutsü aliba ajanga küna abensadaktsür” ta Saif-i interview ka nung tebutsü tanur bena aliba indang jembidang ashi.
Kareena aser Saif-na tanur tenüng Saifeena jatsütsü südi ta tamalen ololu ka liasü. Iba osang Kareena-i “Pai kanga temenünütsüka ajitetba ajanga tanur tenüng Saifeena ajatsü,” ta ashiba sülen iba olulu adok, saka Saif-i kanga karaa iba olulu anenja osang sangdong.