Kargil rara mesükba matalokdaktsütsü : Army Chief

Drass, July 25 (Agencies) : Armed Forces-i Kargil mesükba rara kodanga matalokdaktsütsü ta Honibarnü Army Chief, General Dalbir Singh Suhag-i Jammu & Kashmir kübok Drass semdangdang ashi.

Kargil rara nung taküm bendanger agütsür sepaitem indang nüngshilung nung tetushi agütsüba sülen General Dalbir-i iba osang metetdaktsü.

Kargil War nung India-i takok anguba nüngtem nung Vijay Diwas amunger aser iba benjung ya July 20 nungi tenzüka amunger. Ajisüaka, iba benjungmung nung tongtipang anogotemji tanü aser asüng na alitsü.

Tanü nikongtsütsü pipe band & brass band display liasü aser iba sülen beating retreat ceremony agi. Yashi nikongtsütsü Army-i iba benjungmung tenüng nung dare devil show ka ayongzüka agiogo.

Iba rara nung asür nem tetushi agüja naro yutsüba sentong asüng Deobar agitsü.

Kargil War ya May 1999 nung tenzük aser India o Pakistan sepaitem tsüngda ita ana ser anogo ishika rara.

Pakistan Army nungi Northern Light Infantry sepaitem den tangar kari Srinagar-Leh highway temalen aliba tenemlak kar atsünga agir khatep saka parnoki item tesem toktsür meyipa aoba ajanga India-i iba rara akok. Iba rara nung Indian Army züngsem 490 taküm sama.