Karnataka CM Siddaramaiah-i minister 14 anentsüogo

Bengaluru, June 19 (Agencies): Deobarnü Karnataka Chief minister, Siddaramaiah-i minister 14 anentsü aser par council of ministry nung züngsem 13 aniokogo.
Congress bangdak lenirtemi agizükba sülen cabinet minister teku aser ministers of state pezü tanü Raj Bhavan nung tenangzükba agiogo.
State Angh, Vajubhai Vala-i ketdangsüa parnok nem office tenangzükba agidakja liasü.
Tamalen Siddaramaiah-i minister 14 anendaktsütsü atema benoka liasü aser Angh-ia ibaji agizük.
Cabinet menden atema tanü tenangzükba agirtemji- Tanveer Sait, Kagodu Thimmappa, Ramesh Kumar, Basavaraj Raya Reddy, H.Y. Meti, S.S. Mallikarjun, M.R. Seetharam, Santosh Lad aser Ramesh Jarkiholi nunger lir.
Ano minister of state atema tenangzükba agirtemji- Priyank Kharge, Rudrappa Lamani, Eshwar Khandre aser Pramod Madhwaraj nunger lir.
Thimmappa aser Ramesh Kumar na ya taoba mapang assembly speaker inyaka liasü aser Priyank Kharge ya Lok Sabha nung Congress lenir, Mallikarjun Kharge’er jabaso lir.
Minister menden nungi anendaktsür rongnung Qamarul Islam, Shamanoor Shivashankarappa, V. Srinivasa Prasad, M.H. Ambareesh aser Vinay Kumar Sorake nunger densema lir.
Mapa junga meinyakertem mesüra mangatettep ken o nung densema alirtem minister menden nungi anendaktsü, ta party ketdangsertemi ashi. Iba ya tetemsü züngsemtem ministry nung anioktsü atema lir, ta kasa osang ajanga shi.
2013 küm May 13 nü Chief minister Siddaramaiah tenangzükba agiba sülen nungi tenzüka küm asem dak tema pai minister temi inyakba mapa nung tenük yoka liasü.
Honibarnü party Tir, Sonia Gandhi aser tatong Tir, Rahul Gandhi nati agizükba sülen Siddaramaiah-i minister tasentem shim.
Karnataka nung assembly election agitsü küm ana dang lia party yimsüsüba nung temelenshi tulu adoker.