Karnataka Congress MLA tem resort toktsür pei constituency-i ogo

Bengaluru, Aenjeti/January 21 (Agencies): Karnataka Congress MLA tem Hombarnü Bengaluru nung resort ka toktsür pei constituency bushia ogo, kong parnok Hokolbarnü nungi munga liasü, ta party lenir kati ashi.
“MLA tem ajak resort toktsür pei constituency-i meyipa ogo,” ta Congress state unit tekolakba Dinesh Gundu Rao-i Bengaluru nung osangbenertem dang ashi.
State legislature building nung taoba Chief Minister Siddaramaiah-i senden ka ayonga amenba sülen party MLA 80 rongnungi parnok 70 dak tema Hokolbarnü nungi tenzüka yimti tezülen resort ka nung munga liasü.
Bharatiya Janata Party (BJP) puri Congress MLA tem mesüzüktsü merangba mapang ka nung CLP senden ya party tashi sayutsü asoshi ayongzükogo.
“Onok party nung MLA ajaki, BJP puri Congress-JD-S coalition government raksatsütsü merangba nokdangtsü asoshi longjemer nokdaktsü telemtetba agiogo,” ta Rao-i ashi.
Deobarnü Ballari district kübok Vijayanagara Assembly nungi MLA Anand Singh aser party nung tanga MLA tem tsüngda mangatetep adoka teka sangshitepba sülen pa yirua mozükidangi temang anepalutsü atema anir oa liasü.
Ajisüaka Congress leniri shiba pa amak mesera kechiba amak iba indang osang tejangja magütsü.
BJP puri ashiba agi, Congress pur Chief Minister HD Kumaraswamy-i aniba coalition sorkar kübok parnok taküm asoshi tsübua dang alir.
“HDK sorkar kübok Congress MLA tem parnok taküm asoshi tsübua dang alir. Siddaramaiah-i ajak dang constitutional values indang sayutsüngir. Onoki Dinesh Gundu Rao aser Siddaramaiah na dang Anand Singh amakertem tangsa tang party nungi anentsütsü akhanger,” ta BJP-i tweet asü.