Karnataka & Gujarat nung Maggi nokdangba agiener

New Delhi, October 19 (Agencies): Bombay high court-i tuyuba laboratory asem nung Maggi samples tendangba sülen anogo ana lir tanü Karnataka aser Gujarat sorkari, parnoki state nung Nestle product ayoktsü melatsü, ta sangdongogo.

Karnataka minister UT Khader-i, maggi nung temelaba agüja aliba ama monosodium glutamate (MSG) aser lead shitak aliba ajanga sorkari Maggi nokdanga aliba agientsüsa akum, ta ashi.

Ano Gujarat, Food and Drugs Control Administration (FDCA) Commissioner, HG Koshia-ia, “Bombay High Court-i India ajungalen nokdanga aliba agienang ta tuyuba sülen Gujarat nunga FDCA-i Maggi nokdangba agienogo. Iba telemtetbaji court tetuyuba nung ajemdaker onoki agiogo,” ta ashi.

Maggi tapu balala 6 indang Maggi samples 90 item laboratory tem nung tendanga liasü aser temelaba agüja aliba ama monosodium glutamate (MSG) aser lead shitak liasü, ta kasa osang ajanga ashi.

Tamalen Times of India (TOI) osang ajanga metetdaktsü agi, Nestle India-i National aser International laboratory tem nung Maggi packet million 200 dak tema asoshi test 3,500 agia liasü. Item Maggi ajungaji achitsü junger, ta tendangtet.

Iba dak alia USA, UK, Singapore, Australia densema linük aika nung, India nung yangluba Maggi noodles ji achitsü asoshi junger, ta tendangteta liasü.

Bombay High Court-i tenokdangba agientsü tuyuaka Maharashtra sorkaribo Nestle India anema Supreme Court nung ken o benoktsü lemtetogo.