Karnataka-i Tamil Nadu nem Cauvery tzü magütsütsü lemtet

Bengaluru, September 23 (Agencies): Karnataka Legislative Council-i Tamil Nadu state nem Cauvery ayongtzü magütsütsü telemtetba agiba sülen state assembly-ia Bengaluru yimti aser Cauvery basin tesem nüngdaktem atema dang tzü agütsütsü asoshi bangzüng ka renemogo.
Karnataka Chief Minister, Siddaramaiah-i, Karnataka legislature-i Cauvery atema bangzüng renembaji Supreme Court tetuyuba anema nokdaker masü, ta ashi.
Bengaluru aser Cauvery basin tesem nung tzü agi kanga anüngba nung ajemdaker tanü Karnataka Legislative Council-i iba telemtetba agi.
Council-i, tzüji state nung tajemtsü atema dang nüngdaker, ta ashi.
September 20, 2016 nü Supreme Court-i Karnataka dang September 27 nü tashi Tamil Nadu nem anogoshia tzü cusecs 6,000 agüjang ta tuyuba sülen tanü assembly temeja senden ka ayonga amen.
State Legislative council-i tzü agi kanga anüngba kuli shiogo, ajisüaka parnokisa, January ita sülen tan mongpu atemba sülenang tzü agi koba tashi ka timtemerar metettsü, ta shisem.
Council-isa, Cauvery basin nung reservoir pezüprong- Krishnaraja Sagara, Hemavathi, Harangi aser Kabini nung tzü kanga ajema kümogo. Tang tashi nung ajak senteper tzü 27.6 TMC dang anünga lir, ta ashi.
Tzü agi kanga anünger, ta shia Council-i tzüji Bengaluru aser Cauvery basin tesem nung alirtem nem tajemtsü atema dang agütsütsü, ta ashi.
Iba onük nung o lemtepba sülen Council-i tzüji state nung tajemtsü atema dang amshitsü aser Tamil Nadu nem tzü magütsütettsü ta bangzüng ka renema ayu.