Karnataka-ia ‘Kambala’ temelaba meshir

Bengaluru, January 22 (Agencies): Tamil Nadu nung nashi pongchi azüokba asaya ‘Jallikattu’ temelaba agütsüba sülen kidanger state, Karnataka-ia alu nung nashi pongchi asemtepdaktsüba ‘Kambala’ temelaba agüjang ta akhang tenzükogo.
Tamil Nadu nung Jallikattu temelaba meshia longkak aitba sülen Karnataka nung Kambala committee-ia Mangaluru nung senden ka mena longkak aittsü atema lemtetogo.
Deobarnü Kambala committee Tir, Ashok Rai-i, “Taruba Bodhbar mesüra Brihostibarnü onokia tesem nung longkak aittsü lemtetogo. Mangaluru nung ayongzüka nübur jenti adenshia longkak aitba ajanga onoki yimtenren lenirtem aser linük rangben arakzüdaktsüner,” ta ashi.
“Iba sentong nung Udupi aser Mangaluru tesem nung Kambala sapurtem aser nashi pongchi jura 150-200-i shilem agitsü,” ta paisa ashi.
Pai ashiba agi, “Jallikattu atema temelaba angu süra Kambala atema-a temelaba angutsüla, kechiyong ibaji ozü sobaliba senmang ka lir.”
Shiruru meimer tentet, PETA-i temepishiba ka benokba sülen Supreme Court tetuyuba kübok 2016 küm November ita nung Chief Justice, S K Mukherjee-i aniba Karnataka high court division bench kati Kambala nokdanga lir.
Yashi Kambala committee-i high court division bench nung temepishiba ka agütsü aser iba ken oji January 30 nü angadangtsü.
“PETA shisa tamajung ajanga Kambala nung tetsükdaktsü adok. Onokia ozüng ajanga temeten angutsü ta tamang akar. Kambala aser Jallikattu tsüngda tetsüngda tuluka lir,” ta Committee züngsem, P R Shetty-ia ashi.