Karnataka Khristan temi Jerusalem semdangtsü atema sorkar dang teyari meshir

Mangaluru, September 16 (Agencies): Tanü Karnataka nung denomination balala nungi Khristan lenirtemi Khristan temi Jerusalem, Bethlehem aser Mount Sinai densema Temeshi limatem semdangtsü atema sorkar dang senotsü teyari meshiba memorandum ka Backward class aser minority atema Legislature committee Mendenbuba aser MLA, J R Lobo MLA nem agütsüogo.
Iba memorandum nungji, tesüiba küm ishika tsüngda state nungi Khristan temi Temeshi limatem semdangba kanga bulua kümogo, ta shia lir.
Karnataka nung Khristan tem ya tangar memeneper telok tanabuba jenjang nung lir, anungji Muslim nunger temeshi ainlen jajaba ‘Haj pilgrimage’ atema teyari anguba ama Khristan tem nema teyari agutsütsüla, ta temepishiba shidi nungjisa shia lir.
Mangaluru nung aliba Backward class aser minority atema Legislature committee Mendenbuba office nung memorandum agütsür teshimtet telok nung Karnataka South CSI nungi Jayakar Samartha, Dr Suranjan Maben, Sashipal Shettiyan aser Fr J B Crasta nunger liasü, Holy Rosary Cathedral Parish putir aser Diocese committee secretary, MP Noronha, Mangaluru Diocese PRO, Fr William Menezes aser Catholic Sabha nungi Anil Lobo nunger liasü.