Karnataka kübok Mandya nung bus lendong nung nisung 30 tsükset

Bengaluru, Yimpoksüi/Nov 24 (Agencies): Tanü Karnataka state kübok Mandya district nung nija bus ka tsükokba lendong nung tajemba agi nisung 30 tashi tsüksetogo, ta osang ka ajanga metetdaktsü.
Iba bus nung passenger temji timbaka school tanurtem liasü, ta police-i ashi.
District kübok Kanakanamaradi nung bus ji tsükokba sülen tzü telungi ai, aser tzü telung nungi tasümang 23 agitet. Bus nungji school tanurtem timba mena liasü; school nungi anogo tom nung kidangi meyipa aruba mapang nung iba lendongji atalok.
District ketdangsertem leniba nung kümzükba maparen inyak aser crane ka amshia bus ji tzü telung nungi atsütet.
Iba tesem anasa alirtemi ashiba agi, police tonga marudangyongi parnoki nisung asembo kümzüker liasü.
Karnataka Deputy Chief Minister, G Parameshwara-i, “Bus ka tsükoka nisung 30 süogo ta ni iba osang tang angazüker,” ta shia pai mangyim osang lemsatep.
Iba osang angashia Chief Minister, H D Kumaraswamy-ia sentong ajak thinener lendong atalokba tesem jagi oa liasü.
“Tanü Chief Minister indang sentong ajak thinenogo. Nikongdang award agutsüba sentong ka agitsü liasü, ajisüaka osang tasen ka memetetdaktsü tashi sentong ajak thinener,” ta CMO ajanga metetdaktsü.
Iba osang angashia Ato kilonser, Narendra Modi-i, “Karnataka kübok Mandya nung bus lendong atalokba osang angashia jashir. Asür kibongtem den ni mangyim lemsateper. Iba ama tejashi mapang nung Tsüngremi parnok nem tashi agüjangma,” ta lemsatep.
Congress Party Tir, Rahul Gandhi-ia twitter ajanga mangyim osang lemsatepogo.