Karnataka nung BSY sorkar chireptsü: Siddaramaiah

Bengaluru (Karnataka), Luroi/August 28 (Agencies): Bodhbarnü Congress lenir aser taoba mapang Karnataka Chief Minister, Siddaramaiah-i, state nung BS Yediyurappa’er sorkar chireptsü aser ibaji ajanga state nung election agishitsüsa akümtsü, ta ashi.
Twitter ajanga Congress Legislature Party lenir, Siddaramaiah-i, BJP sorkar ya ‘Operation Lotus’ indang asangchi lir, ta ashi.
Operation Lotus ya BJP anema Congress aser JD(S) nati jaloktsüba nüngja lir. BJP-i tanga party tem nung MLA tem mesüzüka party toktsür parnok den dendaktsür, ta aija parnoki BJP anema Operation Lotus ya jaloktsü.
Paisa, BJP sorkari sen, mesükba aser amokmeren tashi amshia sorkar tashi angur, ta aitsü.
Yediyurappa sorkar ya nüburtemi shimba sorkar masü, ta shia Siddaramaiah-i, “Election agishitsüsa akümtsü, kechiyong iba (BJP) sorkar ya mapang mashie ka nung chireptsüa akok,” ta ashi.
“Yediyurappa-i hopta shia anogo asemnübosa Delhi-i aor. Amit Shah (BJP Tir) den masüngdangtepibo pai telemtetba magiteter. Pai bangdak lenirtem shisa nüngdaker. Iba ya BJP indang chichiba jakla lir,” ta Siddaramaiah-i ashi.
JD(S) nungi lenirtem- JD(S) tongti H D Deve Gowda aser par jabaso, taoba Chief Minister H D Kumaraswamy den yimjung yanglunüba olen ka nung pai, “Onok ya tongti opposition party lir. Onok indang tanemerji JD(S) masü saka BJP lir. JD(S) lenirtem den onok tejashitep mali,” ta ashi.