Karnataka nung by election thinena atar

New Delhi, September 26 (Agencies): Brihostibarnü Election Commission (EC)-i Supreme Court dang, Karnataka nung anenja aliba MLA 17 atema court-i obendang magütsü tashi Assembly constituency 15 atema by election magi atatsü, ta metetdaktsü.
Justice N V Ramana leniba nung judge asemi akümba bench kati, taoba Speaker K R Ramesh Kumar-i MLA 17 House nungi anentsüba tetuyuba anema MLA temi temepishiba ken o benoka lir, aser iba atemaji SC-i obendang agütsütsü, ta metetdaktsüba sülen tanü EC-i election magi atatsü osang metetdaktsü.
Justices Sanjiv Khanna aser Krishna Murari na densema aliba bench-isa, parnoki item temepishiba angadangba sülen telemtetba agütsütsü, ta metetdaktsü.
EC atema jembitsür senior advocate Rakesh Dwivedi-i, “Süra ni Election Commission dang khenpiga atema by election thinena atatsü atema asüngdangtsü,” ta metetdaktsü.
Karnataka nung anenja aliba MLA 17 jagi assembly menden 15 atema agiba by election nungji toktepner.
Bench-i Dwivedi dang, nai ashiba oji record asütsü asü, ta asüngdangba langzüdang pai, “Onoki yamaji inyaktsü” ta ashi.
Ano anenja aliba MLA tem atema jembitsür, Congress lenir Siddaramaiah aser tangartemia election ji atsülang nunga kecha masü, ta shiogo.
Karnataka Pradesh Congress Committee (KPCC) Tir, Dinesh Gundu Rao-i twitter ajanga, “Supreme Court-i anti-defection law aser Speaker Ramesh Kumar tetuyuba reprangshitsü. Anenja aliba MLA temi by election nung metokteptetra ozüngji tagidak mali,” ta ashi.
SC-i iba ken oji maneni October 22, 2019 nü angadangtsü, ta ashi.
Karnataka nung by election October 21 agitsü sentong liasü saka EC-i thinener.