Karnataka nung Congress-i menden teimba angutsü

New Delhi, Monupii (May) 7 (Agencies): Karnataka nung assembly election agitsü anogo tonga arudang ABP-i opinion poll ka agiba nung sorkar kümtettsüsa telok kati danga menden peria takok mangutsü aser menden teimba anguba telokji Congress asütsü ta metetdaktsü.
Congress-i vote 38% angutsü aser parnok sülen BJP-i 33% aser Janata Dal (Secular)-i 22% angutsü, saka telok kati danga sorkar akümtsü menden 112 mongutettsü, ta ABP-isa ashi.
ABP poll ajanga assembly menden 225 nungi Congress-i menden 97 angutsü, BJP-i menden 84 aser JD(S)-i menden 37 angutsü ta ashir. Jembia aruba Karnataka nung taruba sorkar akümtsüba nung JD(S)-i tongti shilem agitsü.
ABP survey agiba nung nisung 38%-i terenlok bener arutsü atema Congress tajungba ta ashir. Maneni nisung 32%-i BJP aser 24% JD(S) nem vote agütsü.
Yimtsüng tia nung alirtem rongnung 39%-i Congress nem aser 32%-i BJP aser 23%-i JD(S) nem vote agütsütsü, ta survey ajangasa bushitet.
Lingayat vote agütsürtemi BJP sapur aser tang teinyakdak Chief Minister Siddaramaiah-i ‘minority religion’ agüjaka parnok rongnung 61%-i BJP nem vote agütsütsü ta ABP poll nungsa bushitet.
Nisung 43%-i Karnataka Chief Minister Siddaramaiah-i sorkar junga ketdang asür ta bilemer. Pa sülen BJP atema CM candidate BS Yeddyurappa pusemer 27% aser Deve Gowda’er jabaso aser JD(S) lennir HD Kumaraswamy pusemer 22% liasü.
Taoba mapang India Today opinion polls ajanga BJP-i vote teimba angutsü saka parnoki tang kümteta aliba Congress sorkar matsüngdoktettsü ta bushiteta liasü.
India Today Group nung Karvy Insights opinion poll ajanga Congress-i menden 90-101 shi angutsü, BJP-i menden 78-86 aser JD(S)-i menden 34-43 angutsü ta ashir.
Monupii (May) 12, 2018 nü Karnataka nung assembly election agitsü aser Monupii (May) 15 nü results adoktsü. Tang teinyakdak Chief Minister Siddaramaiah indang kümsük Monupii (May) 24, 2018 nü tembangtsü.