Karnataka nung Congress-JDS MLA tem Raj Bhawan-i oa nübo sayu

Bengaluru, Monupii/May 16 (Agencies): Tanü Bengaluru nung Congress aser JDS MLA temi parnok züngsem sayutsü atema bus ka nung mener Raj Bhawan-i oa tashi sayu.
HD Kumaraswamy leniba nung Congress-JDS MLA temi Karnataka Angh, Vajubhai Vala ajurua sorkar akumtsü atema asüngdangtsü asoshi Raj Bhavan-i oa liasü.
Yashi Karnataka assembly election osang sangdonga liasü. BJP-i menden timba nung takok ngua single-largest party jenjang angu saka sorkar akumtsüsa menden peria mangu, ano külen Congress aser JDS teloktepibo sorkar akumtsüsa menden peria nguogo, anungji tang state Angh-i kechi inyakdir ta ajaki yongyaa atatepdar.
Raj Bhavan nung Angh ajuruba sülen Kumaraswamy-i, “Onoki Angh dang onoki sorkar akumtsü asüngdangbaji agizükang, kechiyong onoki ozü züngsem timba kuli shidi agutsüogo ta pa dang mepishiogo. Onok züngsem peria lir, majority lir aser sorkar tashi tait ka yangertettsüsa lir,” ta metetdaktsü.
“Angh-i onok dang, linük temzüng nung ajemdaker aser taoba mapangtem nung court-i obendang agutsüba nung ajemdaker onoki mepishibaji asadangtsü ta shiogo,” ta paisa metetdaktsü.
Kumaraswamy den Congress lenir, DK Shivakumar-a liasü, aser pai Angh dak tamang akar, ta ashi.
Shivakumar-i, “Angh-i onok dang, linük temzüng nung ajemdaker pai inyaktsü ta shiogo. Onok züngsem ajak lir aser züngsem kati danga medoktsü. Ibaji mataloktsü (züngsem shingaia medoktsütsü),” ta ashi.
Ano külen KPCC office nung Congress lenir, Ashok Gehlot-i BJP aija, “Parnoki (BJP) sen agüja ozü MLA tem mesüzüktsü meranger. Onoki ibaji magizüktettsü,” ta ashi.
Tang Karnataka nung Congress-JDS MLA tem züngsem shinga memesüzükdaktsütsü atema Bengaluru yimti tezülen resort ka nung amongtsü sentong yangludar, aser külen BJP-i parnok single largest party lir ta shia sorkar akumtsü atema parnok jaoktsüla, ta akhanger.