Karnataka nung minister tasen 7 shimtsü

New Delhi, Rongjui/September 3 (Agencies): Karnataka sorkar kübok minister tasen tenet anioktsü imlar aser Congress o JD (S) nungi MLA 30 nem state nung corporations aser board tongtibangtem nung chairmen jenjana agütsütsü, ta party lenir kati ashi.
Minister tasen tenet shimba sülen Karnataka state cabinet ya Rongjui/Sept hopta tasembuba nung atsülangshia cabinet menden 34 prongla süngdaktsütsü, ta JDS Secretary general Danish Ali-i ashi.
Minister tenet rongnung trok Congress nungi asütsü aser JDS nungi ka asütsü.
Iba dak alia MLA 30 nem state kübok tongtibang board aser corporation tem nung mendenbuba jenjang agütsütsü, ta Ali-isa ashi, shiba coordination committee convener lir.
Karnataka cabinet nung tang minister 27 lir, kong JDS nungi 11 aser Congress nungi 16 lir.
Osang ajanga ashiba agi, sorkar kümtetba sülen anogo 100 abensaba mapang tashi nung minister menden aser tanga tongtibang mapa tazüng alibatem dak sendakba nung MLA tem mepelaba jateta adoka liasü.
Cabinet atsülangshitsü asoshi anogo aika jembia aruogo saka iba ken o ya Chief Minister H D Kumaraswamy aser Congress tekolakba Rahul Gandhi na taoba hopta senden akaba sülen ang bentetogo.
Cabinet atsülangshiba aser board o corporation mendenpur shimba maparen ya Rongjui/Sept hopta tasembuba nung külemi agitsü, ta Siddaramaiah-i ashi.
Iba maparen inyaktsü monuba ajanga Congress aser Janata Dal (Secular) nungi taoba mapang minister menden mataba lenir tejentem mepelai aküm.
Karnataka nung sorkar kümtetba sülen tang mezüngbuba cabinet atsülangshitsü lir.