Karnataka nung pro-tem speaker shimba ken o angadangtsü; ‘Floor test’ agitsü

Bengaluru, Monupii (May) 18 (Agencies): Tanü Supreme Court-i Karnataka chief minister B.S. Yeddyurappa dang Honibar nikongdang tashi nung assembly nung nübo teimba sayuang ta tetuyuba agütsü.
Justice AK Sikri, Justice SA Bobde aser Justice Ashok Bhushan nungertem adenba special bench-i protem speaker ka shimtsü aser House indang telatetbatem ama asüng nikongdang 4:00 ako tashi nung floor test agitsüla ta tetuyuba agütsü.
Iba tetuyuba nung ajemdaker tanü Governor Vajubhai Vala-i Karnataka Assembly nung pro-tem speaker inyaktsü atema K.G. Bopaiah shim saka iba ya Congress aser JD-U-i magizüker.
Temzüng nung lateta aliba ama pro-tem speaker ji MLA tejentiba shimtsüla aser ibaji R.V. Deshpande lir ta Congress-i ashir.
Deshpande ya Congress nungi aser Bopaiah ya BJP nungi lir. Tanü Congress-JD(S)-i Supreme Court nung Karnataka Governor-i pro-tem speaker shimba anema ken o benok aser ibaji asüngnep 10:30 ako nung angatsü.
Ano külen, Karnataka Congress-isa BJP-i süpokrem agütsütsü meranger aser nübo atsür aotsü mesüker ta tai tongloktsüogo.
BJP MLA Janardhan Reddy-i Congress MLA ka nem sen agütsütsü mesüzükba indang audio clip ka tanü Congress-i sayaogo.