Karnataka nung Tipu Jayanthi mamungtsü

Bengaluru, Chiteni/July 30 (Agencies): Karnataka nung tawa kümtetba BJP sorkari Mongolbarnü state nung Tipu Jayanthi benjung mamongtsü asoshi telemtetba agiogo. Parnoki ashiba agi iba benjung dak mepetmesü sendaka lir aser communal lir. BS Yediyurappa-i aniba sorkar telemtetba ya BJP Karnataka-i tweet ka ajanga jangjashitsüogo: “Ozü sorkari Tippu Jayanti benjung mamongtsü asoshi telemtetba agiogo.”
Mysuru yimsüsür Tipu Sultan asoba nüngtem nung amungba benjungmung ya Congress-i aniba Siddaramaiah sorkari tenzüka küm shia November 10 nü munga aruogo.
Benjung ya 2015 küm tenzük koba BJP puri anema liasü. Parnoki Tipu ya tamangba yimsü tsütsü tangar tebilemba magizükba nisung ka ta shia JDS-Congress sorkar dang iba benjung amungtsü telemtetba magitsü mepeshia liasü.
Tipu ya Mysore chuba yimli yimsüsür liasü shiba British East India Company tsükchir tongtiba ka liasü. Pa 1799 küm May ita Srirangapatna nung pa indang fort kümzüktsü asoshi British sepaitem den raraba mapang tepset.
Ajisüaka Tipu Sultan-i Kodagu district atsüngba mapang tetsür aser tebur aika pua rishi kangshia tepset aser nüburtem kangshia Islam yimsü amangdaktsüba ajanga aikati ashishir
Maneni Deepavali anogo Mandya district kübok Melkote jila nung Mandayam Iyengars tepsetba atema pa aitsüogo. Parnok ya iba mapang Mysuru chuba pusemertem liasü.
Ajisüaka puti otsü bushirtem aika iba ken o nung atsüteper shirnoki Tipu ya secular aser modern yimsüsür ka ama züngshir shibai British nunger den toktepa raraa liasü.
BJP aser Hindu nunger lokti tentet kari Tipu ya “religious bigot” aser nisung tepseter ka ama züngshir aser Kannada lokti tentet-temi pa dang “anti-Kannada” ta ajar shibai local oshi toktsür Persia oshi ajungkettsü merang.