Kartarpur corridor nung immigration counter 80 amenoktsü

Lahore, Mongputeni/October 28 (Agencies): Temeshi ainei aoertem takaratiba nung inyakyim tembanger yoktsü asoshi Pakistan-i Kartarpur Corridor nung immigration counter 80 lapokogo.
Taoba hopta India aser Pakistan na Kartarpur Corridor dak sendakba nung tenangzüktepba ka yangluogo aser iba ajanga India nunger temeshi aine aoertem Gurdwara Darbar Sahib semdangtsü asoshi visa mebeni Pakistan-i itettsü.
Iba tenangzüktepba kübok India nunger temeshi ainei aoertem anogo nung 5,000 nem Gurdwara Darbar Sahib semdangtsü asoshi temelaba agütsütsü, kong Guru Nanak masü tsüngda küm 18 lia liasü.
Pakistan interior ministry-i India nunger temeshi aine aoertem asoshi entry gate asem tashi yanglutsüogo, ta Express Tribune sangdong ka ajanga metetdaktsü.
Federal Investigation Agency (FIA)-i temeshi aine aoertem indang clearance list anogo 10 jelia lia Indian border force dangi yoktsü. Parnok atongba sülen passport scan asütsü aser Gurdwara Darbar Sahib-i Pakistan Rangers tekümzükba kübok bus balaka nung anir aotsü, ta osang ajanga metetdaktsü.
Pakistan aser India na prongla nungi temeshi aini aoertem Gurdwara Darbar Sahib-i mai tsüngda biometric screening agitsü. Parnok meyipa aoba mapang koba kishi nungi ai iba kishi nungi dang tugutettsü.
Kasa mapang nung nüburtem shirnok indang passport blacklist nung lir parnok iba tesemi aitsü memelatsü, ta osang ajanga metetdaktsü.
Corridor nung inyakyim nung teyari agütsütsü atema interior ministry-i assistant director ana aser deputy director ka shimogo aser iba den ano inspector, sub-inspector, constable aser tetsür constable 169 shimogo.
Pakistan Ranger temi Zero-Point nung temeshi ainei aoertem ajak dang nungi USD 20 sarutsü.
Immigration counter 80 amenoktsüba dak alia ainertem anisüngzüktsü atema Zero-Point nung immigration hall ka yanglutsüogo. Temeshi aineri aoertem kasa anogo nikongtsütsü 5:00 ako nungbo iba tesem toktsür aotsüla. Parnok shinga Darbar Sahib nung amungtsü memelatsü, saka parnok tanaben arutsü asoshi menokdangtsü.
Km trok talang corridor yagi India nung Dera Baba Nanak shrine aser Kartarpur nung Darbar Sahib na sendakteptsü.
Pakistan Ato Kilonser Imran Khan-i Kartarpur Corridor ya November 9 nü lapoktsütsü sentong yanglua lir.