Kartarpur Corridor nüngshilong azüngba nung Sidhu-i shilem agitsü

New Delhi, Yimpoksüi/November 27 (Agencies): Punjab minister Navjot Singh Sidhu Sangtennü Attari-Wagah arrtsü adena Pakistan-i iogo aser Rasemnü Kartarpur Corridor nüngshilong azüngba nung shilem agitsü. Pai ashiba agi, pa Pakistan semdangba atema Centre nungi tashishiba kecha mali.
Sidhu-i India tsütsü kasa project atema nüngshilong azüngba sentong nung madenba sülen anogo ka lir pa Pakistan-i ogo. Osangbener den sensaksemba mapang pai ashiba agi, Kartarpur Sahib Gurdwara Corridor lapoktsü asoshi telemtetba agiba asoshi medemer aser Pakistan PM Imran Khan nem konang tetushi akaj agütsür.
Arrtsü adena aiba sülen osangbenertem den sensaksemba mapang Sidhu-i, pai Pakistan semdangba ajanga Congress pur dak mekongshitsü kechiyong pai taoba mapang Pakistan semdangba mapang Pakistan army chief Qamar Javed Bajwa den azütepba atema par party puri iba inyakyim rasaa ashitsüsa aküm.
Iba corridor lapoktsü atema Pakistan tsütsü nüngshilong ya Imran Khan-i Rasemnü azüngtsütsü. Iba corridor ajanga Sikh nunger temeshi aini aoertem India nungi Pakistan kübok Gurdwara Darbar Sahib nung oa külemtettsü, kong Sikhism ngutetsang aser mezüngbuba guru, Guru Nanak Dev küm 18 shi 1539 küm masü tashi lia liasü.
Gurdaspur district kübok Dera Baba Nanak tesem nungi International arrtsü adena lenmang ka yanglutsü asoshi telemtetba ya Yimpoksüi/Nov 22 nü Union Cabinet-i agia liasü.
Gurdwara Darbar Sahib Kartarpur ya Pakistan kübok Ravi ayong kümbang nung lir.