Kasa lenmang atema sen crore 71.72 lemzüktsü: NPRAAF

Kohima, September 28 (TYO): Sainik School, Punglwa nungi Jalukie (ODR nungi Intermediate lane – kilometer 28) lenmang yanglutsü atema Finance Department-i anabenren nung Roads & Bridges kübok sen crore 27.25 agütsüogo; March 14, 2017 nü sen crore 12.80 agütsü aser July 18, 2016 nü sen crore 14.45 agütsü, ta tanü Information & Publicity Cell, Nagaland Public Rights Awareness and Action Forum (NPRAAF)-i sangdong ka ajanga metetdaktsü.
DoNER-i lemzüktsüba sen indang tejangja osang mesayui NLCPR kübok agütsü, iba den külemi ibaji mezüngbuba instalment asü tanabuba instalment mesüra tanga instalment’ar kecha shia mali, iba yongji arendaka bilemer, ta parnoki sangdong nungsa shia lir.
Anungji Finance Department-i DoNER ministry-i sen lemzüktsüba aser agütsübaji metetdaktsütsüla, iba den külemi iba project nung teindoktsü sen ajak agi kwi, tang tashi nung sen kwi agütsü, contractor/firm tenüng aser mapaji lateta aliba ama shidak inyaker asü meinyak, ibaji sangdongtsüla, ta NPRAAF-isa metetdaktsü.
Iba dak sendakba nung 2017 küm July 19 nü Npangreu ayong nung tatalokba bilemteter, kong Executive Engineer ka aser SDO ka Pungwla aser Jalukie kübok apu teyangludak semdangba mapang nung nüburtemi tena dak teka sangshiba tu bilemteter; Nübur mesüra sorkari tim mesüi inyakbaji NPRAAF-i magizüker, ajisüaka iba tatalokba ajanga nüburtem kanga timtemba temaitsü sayur, ta sangdong nungsa shia lir.
Sen crore 44.47 indang aputem yanglutsü dak sendakba nung Finance Department-i December 17, 2016 nü Roads & Bridges kübok “additional fund” sen crore 20 agütsü, aser iba senji Phetso aser Chuza ayong nung RCC girder apu (double lane) yanglutsü aser Dzumha apu single lane nungi doublelane yanglutsü atema sen crore 13.00; New Chumukedima o Ngwalo na tsüngda Chathe, Daru, Hekhaperu aser Teru nung RCC girder double aputem yanglutsü atema sen crore 7.00 liasü.
Iba dak alia Finance Department-i May 3, 2017 nü Roads & Bridges kübok kasa project atema ‘State Plan’ nungi sen crore 24.47 agütsü; Phetso aser Chuza ayong nung RCC girder apu (double lane) yanglutsü aser Dzumha apu single lane nungi double lane yanglutsü atema sen crore 3.76 aser New Chumukedima o Ngwalo na tsüngda Chathe, Daru, Hekhaperu aser Teru nung RCC girder double aputem yanglutsü atema sen crore 20.71 aguja liasü.
Drawal Authority (DA) ji “Re-appropriation of fund from Demand no. 27 – Planning Machinery vide letter no.BUD/2-27/2017-18 dated 1st May 2017” liasü, anungji NPRAAF-i FD dang nüburtem dang ‘re-appropriation of fund from demand no 27 – Planning Machinery’ ji kechiar metetdaktsütsü mepishir.
Iba dak alia FD-i joko Centre sorkar tetuyuba nung ajemdaker Non-Plan aser State Plan ama mamshir ta shiogo, süra kechiba FD-i tang tashi ‘State Plan’ ta amshir? ta asüngdang.
Project ana atema tang tashi nung sen crore 44.47 (cr 20+ cr 24.47) agütsüogo, anungji iba project nung teindoktsü sen ajak agi kwi, tang tashi nung sen kwi agütsü, contractor/firm tenüng aser mapaji lateta aliba ama shidak inyaker asü meinyak, ibaji sangdongtsüla, ta NPRAAF-isa metetdaktsü.