Kashima telok FIFA Club World Cup semi-i iogo

Suita, December 14 (Agencies): Japan nung tentetba champions telok, Kashima Antlers-i goal 3-0 agi Atletico Nacional telok madak quarterfinal asaya koka, tang tasayadak FIFA Club World Cup semifinal asayatsü jenjang tanü, Bodbar nü ajangzükogo.
Tanü asaya nung video technology amshia liasü aser Hungary nunger referee, Viktor Kassai-i asaya mezüngbuba shilem nung asaya tatalokba video nung tanaben reprangshiba sülen aibener asayar merenshia, penalty metsütsü maongka agüja, football otsü nung video technology teyari agir mezüngbuba referee küma, otsü tasen yanglu.
Tanü asaya tenzüker minute 31 buba nung Atletico forward, Orlando Berrio-i foul menazüktsüsa Daigo Nishi T-box telung nung alangdaktsüba sülen Kassai-i asayadak tezülen yutsüba monitor nung asaya tatalokbaji tanaben repranga, Kashima telok nem penalty metsütsü maongka agütsü.
Shoma Doi-i iba penalty maongkaji takok ngua agia, par Kashima telok goal 1-0 agi temaba jenjang kümdaktsü.
Tesülen, külem asayar, Yasushi Endo aser Yuam Suzuki natia asaya tanabuba shilem nung goal kaka agüja, par Kashima telok nem goal 3-0 agi takok ngudaktsü.
Par teloki Real Madrid mesüra Club America telok rongnung quarterfinal asaya akoker telok den tan Deobar nü semifinal asayatsü.