Kashiram aser Signal Angami tsüngda arrtsü ken o angatettepogo

Dimapur, September 30 (TYO): Dimapur kübok Signal Angami village aser Kashiram village tsüngda arrtsü mangatettep ken o adoker mapang talangka atsütepa aruba sülen iba ken o angatettepogo.
Lokti ajungtsü tenüng nung yimtsüng ana tsüngda arrtsü ken o angatettep aser iba tenüng nung September 30 nü Kashiram nung sentong ka ayongzüka agidang yimtsüng ana tsüngda tenangzüktep ka agia liasü.
Kashiram village Head GB, Tali Ao-i o jembidang ashiba agi, mapang kabo tesentaktep majungba agi yimtsüng ana nung alirtemi tsüngda temulung melemtepi liasü.
Tanü iba tangatetba agienba aser kidanger tajung ama alitsü atema tesentaktep yangluba atema kanga pelar, ta Tali Ao-isa ashi.
Signal Angami chairman, Keneichosul Sophie-ia ashiba agi, yimtsüng ana putepa alitsü nükjidong nung iba ken o angatetteper.
Yimtsüng anaprong nung lanurtemi tesüiba mapang mangatettep alibatem amadoktsü aser tarutsü atema bilema putepa aser adianu ama alitsüla, ta Keneichosul-i lanurtem ayongzüka jembi.
Signal Angami indang teraji British Raj mapang tashi oa lir. 1930s nung British nungertemi tanü Signal Angami ta ajaba tesem nung Signals company ka mapa lemzüktsü. World War II sülen Signals company-i station toktsür ao aser British nunger iba tesem nung Mikir (Karbi) nungertem alitsü temelaba agütsü. Ajisüaka, 1950s mapang India aser Naga nunger rara tenzükba agi Mikir (Karbi) nungertemi iba tesem toktsür ao, ta Keneichosul-isa ashi.
1950s tatemlen ka nungi Angami Naga nungertemi iba tesem nung aliba sülen Signal Angami ta jatet, ta paisa shisem.
July 1, 2017 nü Signal Angami Village Council (SAVC) aser Kashiram Village Council (KVC) ajurutepa senden ka amen aser idangji council anaprong nungi züngsemtem dena luden ka shima liasü.
Iba luden jagi yimtsüng ana tsüngda arrtsü dak sendakba ken o tem angadangtsü aser reprangshimer tatembang arrtsü latettsü atema council ana dangi osang bener arutsü atema mapa nungloktsü.
Iba onük atema jembitepa arudang KVC-i SAVC dang parnok indang tesüiba Agreement/Documents nung shia aliba arrtsüji agizüker, saka yimtsüng ana atema arrtsüji High Mountain School nung aliba nullah (Westside) asütsü atema asüngdanga liasü.
KVC-i temepishiba agütsüba onükji SAVC-i agizüka angadang aser parnoki arrtsüji Army cantonment road nungi aruba approach road nungi Imtiwati Jamir’er atsü aser High Mountain School indang nullah asütsü shidang.
SAVC-i ashibaji Kashiram Village Council-i mulunga agizük aser tatem nung yimtsüng ana tsüngda arrtsü ken o angatettepa, tanü tenangzükba nung yimtsüng ana nungi taintem den council züngsemtemi sign asü.