Kashmir atema raratsü renema lir: Pakistan PM Imran Khan

New Delhi, Luroi/August 14 (Ageicies): India sorkari Jammu & Kashmir nung Arrla 370 agienba dak sendakba nung Bodhbarnbü Pakistan Ato kilonser, Imran Khan-i, Kashmir nunger temeden atema Pakistan-i tongbang raratsü melunga lir, ta metetdaktsü.
Khan-isa Rashtriya Swayamsevak Sangh (RSS) teloka aitsü.
India nung Muslim nunger loktii züksetba tatalokbatem dak sendakba nung Khan-i, India linük nung Muslim nunger tetsübu nung liteper, ta ashi.
Khan-i, “(J&K nung) Tang mokdangba ajanga meimchir temedentem anema inyakba atema onoki tebilemtsü akar,” ta ashi.
India sorkari aibelen tulu ka inyakogo, ta shia Pakistan Ato kilonseri, “Pai (Narendra Modi) tatembangbuba asaya ka asayar, ajisüaka ibaji India atema jenjang kanga tasak asütsü,” ta ashi.
“Alima linüktemi Kashmir atema mebilemer, ajisüaka Pakistan-i Kashmir ya alima onük ka kümdaktsütsü atema maneni inyaktsüla. Kashmir atema brand ambassador ji ni asütsü ta ni nangzüker,” ta Imran Khan-i ashi.
“Kashmir atema ni brand ambassador akümtsü aser sabang ajak nung ni iba onük atema jembitsü. Mezüngbuba nung tangbo Kashmir ya alima onük ka kümdar. Ni Donald Trump (US Tir) den iba atema jembiogo aser OIC nunga benoka jembiogo,” ta pai ashi.
India nung aliba Muslim nunger nütsüng crore 18 atema lendong lir, ta shia Khan-i, “Indian Kashmiri yimtenren lenirtemi linük ana tangatetba pusemer,” ta ashi.
“Ozü army temi küm 20 jungnüa kiralongra anema rarar. Ozü nüburtemi ozü temeden atema nokdaktsü renema lir. Yang (Pakistan) nungi onoki tatalokbatem repranga arudar. Pakistan renema lir; ozü army aser nüburtem longjema lir,” ta paisa shisem.