Kashmir dak sendakba tasüng-dangba ajak langzütsüla: Supreme Court

New Delhi, November 21 (Agencies): Brihostibarnü Supreme Court-i Jammu & Kashmir administration dang, J&K nung Arrla 370 agienba sülen tenokdangbatem dak sendakba nung tasüngdangba ajak nenoki langzütsüla, ta metetdaktsü.
Justice NV Ramana-i aniba bench-i administration tenüng nung jembir Solicitor General, Tushar Mehta dang, Kashmir nung tenokdangbatem anema temepishiba ken otem tejangja agüja lir anungji temepishiba ken o agütsürtemi asüngdangba ajakji nai langzütsüla, ta ashi.
“Mehta, temepishiba ken o agütsürtemi asüngdangba ajakji nai langzütsüla. Nai agütsüba counter-affidavit ji onoki tatembangbuba telemtetba ka agitsüsa masü,” ta bench-isa metetdaktsü. Kasa bench nung tanüngba züngsem anaji Justices- R Subhash Reddy aser BR Gavai na lir.
Mehta-i, “Ttenokdangbatem dak sendakba nung temepishiba agütsürtemi aitsüba osangtemji shidak masü, anungji court nung ni lenla ajaklen jungi telangzüba agütsütsü,” ta ashi.
Kashmir nung tenokdangba kar benokba medenja Mehta-i, “Jammu & Kasmhir nung tenokdangba benoktsü mesüra agientsü atema ketdangsertemi asadanger inyaker,” ta ashi.
Kashmir tensa metetdakja Solicitor general-i Supreme Court dang, Arrla 37 benokba sülen Kashmir nung school tem tanaben lapokogo aser school 917 bo khenyongi meshibangi liasü, ta metetdaktsü.
Kashmir Times Editor, Anuradha Bhasin-ia Jammu & Kasmhir nung communications nokdangba anema temepishiba ken o ka agüja lir, aser iba dak snedakba nung bench-i, ken o ka dang (businessman ka pua ayuba) anünga lir, kechiyong temepishiba ken o agütsüsang jagi JK High Court aser Supreme Court naprong nung ken o agütsü, ta metetdaktsü.
“RTangbo item ken oji high court nung agienogo, anungji tangbo ken oji yangi (Supreme Court) nung anüngdaka lir,” ta bench-isa ashi.