Kashmir, Handwara nung sepaitemi telungpur pezü kahset

Srinagar, Sept 03 (Agencies): Srinagar nungi kilometer 95 shi pila oor Handwara nung aliba arem nung yasüng nungi tanep tashi kahtepdang sepaitemi telungpur pezü kahsetogo, iba den sepai-a ka süogo.

North Kashmir, Kupwara district kübok Sochalyari nung aliba arem nung telungpur aliba osang ka yasüng lazükba sülen security sepaitemi telungpurtemji mita ao, ta tanü police ketdangser kati ashi.

Iba sülen telungpur aser security sepaitem na tsüngda yasüng nungi tanep züngia tashi kahtep, ta ketdangserisa ashi.

Iba rara nung koba telok nungi’ar mejangjatetba telungpur pezü kahset, aser Army kata süogo, ta paisa ashi.

North Kashmir nung tesüiba anogo ana tsüngda security sepaitemi telungpur mita aoba nung maparen nung anabenbuba takok tulu angur.

Yashi army temi telungpur ka kahset, aser paji tawa nisung aika tepsetba aser Baramulla district, Rafiabad nung mobile installation raksatsüba nunga densema liasü.

Yashi kahsetba telungpur sangji Lashkar-e-Islam (LeI) telok nungi Riyaz Ahmad liasü ta jangjaogo.

“Sopore aser temeket tesemtem nung nisung aika tepsetba nung pa densema liasü. Mobile tower kibur aser mobile franchise kiburtem amokmerenba nunga pa densema liasü,” ta army otongdar kati ashi.