Kashmir-i CRPF telok 20 talila yoksemogo

Srinagar, July 17 (Agencies) : Jammu & Kashmir nung tensa kanga mejungi akümba ajanga ibaji ozüng kübok azüoktsü aser lendong nokdangtsü atema Centre Deobarnü Central Reserve Police Force (CRPF) telok 20 talila yoksemogo.
Tensa majungba ajanga school ajak mei sodi July 24, 2016 tashi atsülangshitsüogo.
State nung tanaben ozüng aser yimjung bener arutsü mechi Jammu & Kashmir nung curfew tenzüker tanü Deobarnü tashi nung joko anogo 9 nü buba ajunger.
Iba curfew tenzükba ajanga tan tepsetsang Wani pusemertema longkak maitet.
Security aser longkak aitertem raraba ajanga tang tashi nung nisung 38 shi süogo aser aika yirur lir.
Jammu & Kashmir nung Cell phone service aser mobile internet ajak shibangtsüogo.
Sorkari Kashmir tenemtsünglen Cable TV network-a dena shibangtsüogo.
Iba rara kecha tesüngjemba makümer kechiba süra Kupwara district nung lendong agütsüba sülen ano Honibarnüa longkak aitertemi police amakdang public ka asü.
Iba tesem nung ano rara tasen ka nung public ana yirusemer lir.
Nisung telok tulu kati ain aita Kupwara district kübok Hatmulla nung aliba police post ka amakba ajanga police temia meyipa rara.
Hokolbarnüsa Kupwara district nung police-i injang akahba mapang longkak aiter rongnung ka asü aser 3 yiru.
Centre aser state Chief Minister Mehbooba Mufti nungeri nüburtem dang state sorkar tem den amalitepa yimjung nung alitsü merangang ta mepishiaka raraba manener.