Kashmir ji India tashi, saka Centre-i tashimait kümdaktsür: Rahul Gandhi

New Delhi, June 04 (Agencies): Deobarnü Congress tatong Tir, Rahul Gandhi-i, tang Kashmir nung tensa mesüngjemteti aliba ya Centre sorkar tai ajanga lir, ta aitsü.
State nung BJP-PDP teloktepji tashimait, ta shia Rahul-i, Centre sorkari, Kashmir nung tesünep bener arutsütsü ta yazü nangzüker, aser parnoki Kashmir onük atema tim mesüi inyaker, ta aitsü.
Osangbener den jembidang Rahul-i, “Ita 6-7 tejaklen Arun Jaitley (Union Finance Minister)-i ni ajurua liasü. Ni pa dang ‘nenoki Kashmir onük atema junga meinyaker aser yangji nenoki lendong adokdaktsütsü’ ta ashi. Ajisüaka Arun Jaitley-i kü o meyipja, Kashmir nung tesünep lir ta ashi. India sorkar aser Ato kilonser nati Kashmir onük atema tim mesüi inyaker,” ta ashi.
“Parnoki (BJP) tim mesüi inyakba aser yimtenren nung tajangzük angutsü atema Kashmir amshiba ajanga linük nung timtem adokdaktsür,” ta Congress lenirisa ashi.
Tang Jammu & Kashmir nung BJP-PDP teloktep nung timtem adokdar, aser state nung tensa majungba atema party kati ka aitsütepdar, ta osang angazüker.
“Kashmir ji India’er tashi lir, saka parnoki (sorkar) ibaji ajanga India tashimait kümdaktsür,” ta Rahul Gandhi-i shisem.