Kashmir, Kupwara nung sepaitemi telungpur trok kahset

Srinagar, June 24 (Agencies): Tatalokba ana nung north Kashmir, Kupwara district nung security sepaitemi telungpur trok kahsetogo.

Mezüngbuba tatalokba nung, osang ka lazükba sülen army aser police senteper Dobwan arem nung telungpur mita aodang Lolab tesem nung telungpur asem kahset, ta army ketdangser kati ashi.

Telungpur mita aodang telungpurtemi tama injang kahloktsü, aser parnok tsüngda kahtepdang telungpur asem kahset, ta paisa ashi.

Ano tanga tatalokba ka nung Brihostibar nikongdang Drugmulla tesem nunga telungpur asem kahset, ta ketdangseri ashi.

Drugmulla kübok Waterkhani arem nung telungpur aliba osang angazükba sülen sepaitemi parnok mita aodang telungpur asem kahset, aser maneni telungpur mita odar, ta ketdangserisa shisem.