Kashmir nung ajak den jembitsü melunga lir: Rajnath Singh

New Delhi, September 08 (Agencies): Union Home Minister, Rajnath Singh-i Jammu & Kashmir anogo pezünü semdangtsü lia Hokolbarnü pai, sorkari state nung stakeholders ajak den Kashmir onük jembitsü melunga lir, ta metetdaktsü.
“Onoki ajak den jembiner. Anungji shibaisa ken o jembitsü atema ajurudir, ni jembitsü,” ta pai New Delhi nung osangbenertem dang ashi.
Singh-i Honibar nungi tenzüka anogo pezünü Jammu & Kashmir semdangtsü, aser pai, Kashmir onük latettsüji sorkar nükjidong lir, ta metetdaktsü.
Rajnath den tang tasen shimba, Union Home Secretary, Rajiv Gauba aser ministry nung tongti ketdangsertema densema aotsü.
Iba mapang nung Rajnath-i state Angh, N.N. Vohra aser Chief Minister, Mehbooba Mufti nata ajurua jembitsü.
Paisa Prime Minister’s Development Package aser state nung security tensa reprangshitsü sentong lir.
Rajnath-i Srinagar aser Jammu yimti na nungi lokti tentet balala nungi lenirtem ajurutsü aser police, CRPF aser BSF ketdangsertema ajurua jembitsü.