Kashmir nung Army-i operation ‘Calm Down’ tenzükogo

Srinagar/New Delhi, September 13 (Agencies): July 9, 2016 nü nungi tenzüka tanü tashi Kashmir Valley nung tensa mesüngjemteti lia longkak aitertem aser telungpurtem anema army-i sepai 4,000 tali yoksema operation ‘Calm Down’ tenzükogo.
“Longkak aitertemi telungpur teyari agia Kashmir nung longkak aita tongti lenmang aika mokdangba mapang tensa süngjemtsü atema sepai 4,000 tali yoksemogo, ajisüaka parnok dang tashi talitabong mamshitsü asoshi tetuyuba junga agutsüogo,” ta ketdangsertem osang ka ajanga ashi.
Sepaitemji South Kashmir nung district pezü- Pulwama, Shopian, Anantnag aser Kulgam. nung mapa lemzüktsüogo.
India sepaitemi July 8, 2016 nü Hizbul Mujahideen telungur commander, Burhan Wani tepsetba sülen July 9 nü nungi tanü tashi longkak aitdang nisung 78 tashi süogo.
Wani ya iba tesem nungi lir.
CRPF aser state police teyari agia army temi tesem ajak mita odar aser longkak aitertemi süngdong, light tongshi aser long agi gari lenmang mokdanga aliba merükteta odar, ta ketdangsertemisa ashi.
Sepaitemi Pulwama nung Karimabad tesem merüktetba sülen Shopian aser Kulgam nati ogo. Iba maparen ya Bakrid benjung ajanga khenpiga atema anena atar saka benjung sülen maneni tenzüktsü, ta osang ka ajangasa ashi.