Kashmir nung Curfew maneni benoker, asür nisung 80 jungogo

Srinagar, September 16 (Agencies): Kashmir nung taoba hopta longkak aitdang yirua alir ka tanü Hokolbarnü süogo, aser ibaji züngsemabo July 8, 2016 nungi tenzükba Kashmir rara nung asürtem nisung 80 jungogo.
September 5 nü South Kashmir, Pulwama nung longkak aitdang Basit Mukhtar tear gas shell ka agi yirua liasü aser tanep pa Srinagar nung aliba hospital ka nung asü.
Tanü Kashmir tesem aika nung curfew ozüng tanaben benokogo, aser item rongnung yimtiba, Srinagar densema lir.
“Srinagar yimti aser Baramulla, Pattan, Anantnag, Shopian aser Pulwama jilatem nung curfew ozüng benokogo,” ta police ketdangser kati ashi.
Kashmir nung Hokolbarnü shia Muslim nunger sarasadem sülen longkak aita rara adoker, ibayongji item tesem nung curfew ozüng benok, ta ketdangserisa ashi.
July 8, 2016 nü sepaitemi Hizbul commander, Burhan Wani tepsetba sülen nüburtemi longkak ait tenzüker tanü anogo 70 jungogo.
State nung Separatists-i longkak aitba sentongji September 22 nü tashi akatsü ta anogo atsülangshiogo.