Kashmir nung district pezü nungi curfew ozüng agienogo

Srinagar, July 23, 2016: Honibarnü Srinagar, Batmaloo nung longkak aitertemi curfew ozüng alema yimti tiyongi aodang police-i parnok nokdangba noksa nung angur. Ano Srinagar yimti tesem aika nung maneni curfew ozüng benoka lir.

Srinagar, July 23 (Agencies): Kashmir nung aliba district pezü aser Srinagar yimti tesem kar nung tensa tajungba akümba ajanga tanü item tesem nung curfew ozüng agienogo, ajisüaka tanüngba Kashmir Valley nungbo ano maneni iba ozüng benoka lir.
“Bandipora, Baramulla, Budgam aser Ganderbal district tem den Srinagar yimti tesem kar nung curfew agienogo, kechiyong item tesem nung tensa tajungba kümdar,” ta tanü police ketdangser kati ashi.
Ketdangserisa, ajisüaka curfew agienba tesemtem nung maneni Section 144 CrPC ozüng kübok nisung pezü mesüra iba dak tali adenshitsü memelar, ta ashi.
Pai ashiba agi, Kashmir Valley nung Anantnag, Kulgam, Kupwara, Pulwama aser  Shopian district tem aser Srinagar yimti kübok police station 8 tesemtem nung maneni curfew ozüng lir.
Tang tashi nungbo Kashmir Valley nung tensa junga lir.
Tanü Union Home Minister, Rajnath Singh yimti tonga arutsü sentong lir, ta paisa ashi.
Singh yimti tonga aruba sülen state tongti ketdangsertem den senden amentsü aser nikongdang pai lokti balala, yimtenren lenirtem aser shishilembartem nungi züngsemtem ajurua jembitsü.
Asüng-a pai ano lokti balala den senden aika amentsü, iba sülen pa New Delhi-i meyipa aotsü, ta osang angazüker.
Security sepiatemi Hizbul Mujahideen commander, Burhan Wani tepsetba sülen anogo ka lir July 9 nü nungi tenzüka Kashmir nung tensa mejungi lir.
Yashi-a Kashmir nung Muslim nunger ‘Hokolbar sarasadem’ senshiba sülen tesem ishika nung longkak aitertem aser sepaitem tsüngda rara adoka liasü, iba mapang nung lanur ka asü aser pezü yirua liasü.
Telungpur lenir Wani tepsetba sülen anogo aika longkak aita sepai den raradang tajemba agi nisung 46 süogo aser nisung 3400 dak tema yiruogo.