Kashmir nung Eid sarasadem sülen rara adok

Srinagar, July 18 (Agencies): Tanü Muslim nunger Eid sarasadem tembangba sülen Srinagar yimti nung lungkak aiter kari Pakistan nunger wako asong aser Srinagar o Anantnag district na tesem aika nung lanurtem aser security sepaitem tsüngda lung agi ontepa rara adoka liasü, ta police-i ashi.
Eid sarasadem tembangba sülen Srinagar, Eidgah tesem nung lanur telok kati police aser paramilitary sepaitem dak lung agi aon tenzük, ta police ketdangser kati ashi.
Tesülen lendong menartemji sepaitem mintok.
Ano Kothibagh tesem nunga lanurtemi sepaitem dak lung agi aon saka tesülen police-i tensaji azüokteta liasü, ta ketdangseri ashi.
Pakistan nunger wako ishika Old Barzullah kiyong nung asong.
South Kashmir, Anantnag, Lal Chowk nung lanur 50 shii sepaitem dak lung agi aon tenzük saka police-i parnoki mintok, ta paisa ashi.
Item tatalokba nung nisung shinga meyiru aser Kashmir Valley nung Eid sarasadem junga tembangogo.
Yashia Srinagar nung lanur telok ka aser security sepaitem tsüngda rara adoka liasü, iba mapang nung separatist züngsem kari Pakistan wako den Lashker-e-Toiba (LeT) aser ISIS wako ayipshia liasü.
Srinagar, Nowhatta tesem nung aliba Jami Masjid nung Eid sarasadem tembangba sülen lanurtemi item wakoji ayipshiba den separatist aser Pakistan pusemba yimyim ayima liasü, ta police ketdangserisa shisem.