Kashmir nung Home Minister Rajnath-i senden ayonga amen

July 24, 2016 nü Union Home Minister, Rajnath Singh Srinagar yimti nung aliba Technical airport tonga arudang tangokba noksa nung angur. (Srinagar, July 24, 2016). 

Srinagar, July 24 (Agencies): Deobarnü Union Home Minister, Rajnath Singh-i Kashmir tensa reprangshitsü atema temaba jenjang nung security senden ka ayonga amenba den külemi yimtenren party balala nungi lenirtem ajuruba sülen south Kashmir kübok Anantnag district semdanga liasü.
Taoba state Chief Minister, Omar Abdullah leniba nung National Conference (NC) nungi teshimtet telok katia Srinagar, Nehru Guest House nung Rajnath ajuruogo.
Union minister-isa tang sorkar tashi nung aliba party, Peoples Democratic Party (PDP) den Kashmir nung tanga yimtenren party lenirtem ajurua liasü.
Temaba jenjang nung security senden nung Chief Minister, Mehbooba Mufti, senior ketdangsertem, police ketdangsertem aser state o central intelligence agency tem den para military sepai ketdangsertem dena liasü.
Singh-isa tang rara adoka aliba Anantnag district semdanga ketdangsertem den tensa indang metetpelaa liasü.
Iba sülen nikongdang pa New Delhi-i meyipa ogo.
Deobar anepdang ketdangsertemi Kashmir Valley nung aliba district 10 nungi district 4 nung curfew ozüng agienogo.
Tawa Hizbul Mujahideen telungpur telok commander, Burhan Wani tepsetba sülen anogo 15 tashi Kashmir nung longkak aita sepaitem den raradang tajemba agi nisung 46 asüba den aika yiruogo, ajisüaka tangbo tensa tajungba kümdar.