Kashmir nung ‘international marathon’ asemtepdang timtem agütsü

Deobar nü Srinagar nung Kashmir University-i ayonga mezüngbuba ‘International Kashmir half Marathon’ asemtepdang police aser nüburtem raratepba noksa nung angur.

Srinagar, Sept. 13 (TYO) : Deobar nü Kashmir lenden lima nung ‘international half marathon’asemtepba mapang sepaitem o asangurtem na tsüngda raratep aser iba sülen sepaitemi asemteper tetsürtem mesüshia timtem agütsüba asoshi nisung 12 apu.
Iba asemtepba sentong ya Srinagar nung aliba tongtibang awatsüng, Dal Lake kümzüka ayutsü asoshi tangatetba agüja jajaba sentong Kashmir University, Hazratbal nung ayongzüka liasü. Iba mapang lanurtem rongnung kari Pakistan flag ajungketa sayu aser India anema ola adoka ayimten. Idangji policetemi lathi agi azük aser teargas yoka meindok.
“Tensa mapangjibo azüokteta lir aser yiruyipongba lendong kecha mali asü.,” ta police-isa metetdaktsü.
Iba lendong atalokba osang angashia yimten teloktemi taitsüba osang metetdaktsüogo.
Taoba Chief Minister Omar Abdullah, iba asemtepba sentong nung adentsüba liasü saka alima tensa majung akümba agi shilem magi thinen.
” Asemtepba nükjidongji ‘ Dal kümzükang,’ ta dang liasü aser iba ama mapa nunga yimten onük benoka timtem angutsüsa inyakbaji kanga majung,” ta Omar Abdullahi metetdaktsü.
PDP lenir kati ashiba agi, asemtepba sentong nung shirnoki Pakistan flag sayua ayimten parnok jagisa tetsürtem mesüshia timtem agütsü.
PDP tir aser MP Mehbooba Mufti-i tetsürtem mesüshia timtem agütsüba osang angashia kanga jashir. Iba ama jakla tamajungji tanü tejakleni aoba lokti nung mapeter, anungji iba ama mapaji anema lokti tentettemi ola adoka inyaktsüla ta PDP lenirisa metetdaktsü.
” Asemtepba nung kechi tai aliar mangatetter. Kechiba asangurtemi asemtepba mapaji dang anendaktsütsü merang masü saka shilem agir tetsürtem maksüdakja mesüshi ?,” ta laisa ashi.
” Iba asemtepba sentong ya junga ooya liasü saka ajungbena ka dang telok rongnungi ozüng raksartem kari o tamajung jembia tetsürtem mesüshitsü tenzük. Iba sülen police station nung FIR agütsü aser Nigeen police station nung nisung 12 puoka lir, ” ta police tenüng nung jembir kati ashi
Kilometer 21 asemtsüba half marathon ya Dal Lake tzüküm nung Foreshore Road ajanga asemtsüba liasü. Iba sentong nung international marathoner den yangji alirtema dena shilem agitsüba liasü.