Kashmir nung ISIS nung adentsü jangrartem aika lir : Army

Jammu, October 25 (Agencies): Syria aser Iraq nung kiralongraba mapa inyaker telok Islamic State nung adentsü jangrartem Kashmir nung lir aser iba ya azüoktsü atema mapa inyakdar, ta Lt General Satish Dua, commander of 15 Corps-i osangbener dang ashi.
“Army-i ISIS sapua mapa inyakba jungjunga mita reprangdar. Iba asoshi bangdakpur telok ajaki inyakdar aser azüoktettsü” ta Lt General Dua-isa ashi.
Taküm September ita intelligence agency kati bushisüngdang asüba nung ISIS atema internet traffic timtibaji Jammu & Kashmir nungi lir ta bushitet. J&K sülen tanabuba state ji Assam lir ta bushitet aser iba sülen Assam state police-i internet traffic kanga junga mittsü tenzükogo.
Centre sorkaribo India nung Islamic State indang khuret balaka mali ta nenshia metetdaktsüogo aser tawa tu Union minister Kiren Rijiju-i ISIS ama talila bilemloka oa inyakba teloktemi India nunger mesüzükba mapa noktangtsü atema mapa tenzükogo ta ashi.
Ajisüaka, India nunger trok tashi Islamic State atema raradang Syria nung tepsetogo. Ano parnok 60 – engineers, chartered accounts aser medical professional tem ISIS nung adentsü atema aodang India airport balala nung apu.
Kashmiri nunger lisopurtemi kiralongrar telok nung züngsemba osang aika angazüker, ta Lt General Dua-isa osangbener dang ashi.
Tang tashi nung Jammu & Kashmir nung kiralongrar 229 shi lir aser parnok rongnung 59 bo bendangertem lir. Lisopurtem aikati kiralongrar den adener aser Kashmir anüolentip tsütsü bendanger kiralongrar 7 aser anüdoklentip tsütsü 44 lir, ta paisa shisem.
Kiralongrartemi ozüng alema India nunger lushii aittsü meranger saka sepaitemi parnok noktanger. Ajisüaka, taküm rüjeb alu metenzükdang parnoki kanga merangtsü, ta Lt Gen Dua-isa ashi.