Kashmir nung kiralongrar 2 kahset

Srinagar, February 04 (Agencies): Honibarnü Kashmir, Sopore tesem nung police aser security sepaitem senteper Hizbul Mujahideen kiralongrar ana tepsetba ajanga kiralongrartemi amaktsü aliba lendong ka nokdangtetogo.
Kiralongrartemji gari ka nung arudar aser parnoki Sopore nung kiralongratsü ta osang ka angazüba sülen sepaitemi parnok Amrgarh Sopore anasa ajuru. Iba sülen kiralongrartem jagi grenade ka onloktsüba den injang kahloktsüdang SP operation, Baramulla Shafqat Hussain aser sub-inspector of police, Mohammad Murtaza na yiru. Kasa rara nungsa kiralongrar anajia kahset.
Tena ket nungi AK prangpong ana, pistol ka, grenades 4 aser injang angu. Kiralongrar anaji Kupwara nungi Azhar Khan aser Sopore nungi Sajjad Ahmed Lone na liasü, ta jangjaogo.
Sajjad jibo 2016 küm March ita nung Wagah arrtsü adena Pakistan-ia oa liasü.