Kashmir nung kiralongrar 3 khaset

Srinagar, July 15 (Agencies): Honibarnü Kashmir, Pulwama district kübok Tral tesem nung security sepaitemi kiralongrar asem khasetogo, ta police-i metetdaktsü.
Tral kübok Satoora arem nung kiralongrartemi security sepaitem dak tama injang khaloktsü, iba sülen telok ana tsüngda rara tenzüka liasü.
Iba rara nung kiralongrar asem khasetogo, aser maneni kiralongrar tenet shi atsüka alitsü südi ta bilema sepaitemi mita odar.
Item kiralongrartemji Pakistan nung amenoka aliba Jaish-e-Mohammad (JeM) den sendaktepa alitsü südi, ta melung melemi bilemer, ta police-isa metetdaktsü.
Osang angazükba agi, kiralongrartem jagi state nung tongtibang highways amaktsü sentong liasü.
Tanü iba tatalokba sülen Special Task Forces-i choppers amshia kiralongrartem maneni mita odar.
Ano Intelligence osang ajanga ashiba agi, tang Kashmir nung pei taküm tenla agüja bomb pokdaktsütsüpur aika lir.
Hokolbarnüa Jammu & Kashmir, Bandipora district kübok Sambal tesem nung Special Operation Group (SOG) Sumbal aser 13 Rashtriya Rifles (RR) sepaitem senteper kiralongrar ka pua liasü. Iba nisungbaji Shahbaz Mir lir ta jangjaogo.
Pa ket nungi pistol ka den injang, grenades pezü aser kotari ka apu.
Ano külen tanga osang ka nung, tanü New Delhi nung Jammu & Kashmir Chief Minister, Mehbooba Mufti-i Union Home Minister, Rajnath Singh ajurua state tensa indang tebilemtsü onüktem lemsatepogo.