Kashmir nung Lashkar-e-Taiba telungpur asem kahset

Srinagar (Jammu & Kashmir), December 08 (Agencies): Brihostibarnü Kashmir nung security sepaitem aser Lashkar-e-Taiba (LeT) telungpur tsüngda ghonda trok shi kahtepdang telungpur asem kahset, koba ajanga Kashmir anüolen tiptsütsü tesem aika nung longkak aita liasü.
Olulu meproktsü atema tesem aika nung mobile phone aser internet services aika anentsüogo.
Police-i ashiba agi, telungpur asür asempronglaji Kashmir nunger lir.
“LeT nungi local telungpur asem tepsetogo. Ajisüaka maneni telungpur mita odar,” ta police ketdangser kati ashi.
Kashmiri telungpur asem tepsetba osang prokba sülen sepai aser telungpur na raraba tesem jagi longkak aitertem aodang sepai aser longkak aitertem tsüngda raratepa liasü.
Telungpurtem longbanga aliba kidangji Lashkar-e-Taiba commander, Abu Dujana-a lir ta mezüngbo olulu proka liasü.
Police-isa ashiba agi, iba kidangji telungpur atsüka lir ta osang lazükba sülen security sepaitemi Bodhbar ayaterm mapang iba kiji longbanga liasü.
“Anepdang telungpurtemi mezüng sepaitem dak injang kahloktsüba sülen parnok tsüngda sashia kahtep tenzük,” ta police ketdangser kati metetdaktsü.