Kashmir nung LeT tongti lenir Abu Kasim kahsetogo

Srinagar, October 29 (Agencies): August 5 nü Udhampur nung BSF sepaitem indang bus ka amakba sentong asameyanger tongti, Lashkar-e-Taiba (LeT) telungpur commander, Abu Qasim Jammu & Kashmir nung kahsetogo, ta Brihostibar nü police-i metetdaktsü.

“Tanep anepongi Kulgam district kübok Khandaypora yimtsüng nung security sepaitemi mendanger amakdang LeT Operational commander Abu Qasim tepsetogo,” ta police ketdangser kati ashi.

Police ketdangserisa, Abu Qasim tepsetba ya, Jammu & Kashmir nung security sepaitemi tang operation tagitak nung takok tulu ka anguba lir, ta ashi.

“Abu Qasim tenüng shitakbabo Abdul Rehman lir aser pa ya Pakistan Punjab province, Bahawalpur district nung telitak aser tesüiba küm pongu tsüngda Kashmir nung kiralongra mapa inyaker telungpur ka aser kanga bushia alir rongnung ka liasü,” ta ashi.

“Kulgram district nung tanep 2:00 ako meta security sepaitemi pa kahset aser pa tepsetba ya ajanga state nung Separatist kiralongraba nung tamakok tulu angutsü,” ta Inspector General of Police, Kashmir Zone, Syed Javaid Mujtaba Gilani-i ashi.

Pakistan nung alir Abu Qasim ya Udhampur amakba nung tongti aibelener lir. Udhampur nung BSF amakba mapang BSF sepai ana tepset aser 11 yirua liasü, ta paisa ashi.

“Iba ya takok tulu ka lir ajisüaka kiralongrartem ajunga mesamatsü tashi onok zübazülema malitsü,” ta paisa shisem.