Kashmir nung longkak aitbaji Pakistan ajanga lir: Rajnath

New Delhi, July 21 (Agencies): Brihostibarnü Union home minister, Rajnath Singh-i Kashmir Valley nung longkak aitbaji Pakistan ajanga lir ta tai tongloktsü, ajisüaka tensa tajungba akumtsü atema sorkari mera ajak agia inyakdar, ta paisa ashi.
Lok Sabha nung Kashmir onük nung o toktepba mapang Singh-i, “Pakistan-i par linük telung tebilemtsütem atema inyaktsüla, ajisüaka parnoki India tashi meitdaktsütsü ang meranger,” ta ashi.
“India nung kiralongraba lira, ibaji Pakistan-i senotsü agi kiralongraba yariba ajanga lir,” ta Home minister-isa ashi.
“Tamangba yimsü tenüng nung ajemdaker asen kidangeri Kashmir Valley tensa raksatsütsü meranger,” ta paisa aitsü.
Pakistan aija Singh-i, “Tamangba yimsü tenüng atemer parnoki India dang nungi pila, ajisüaka kiralongraba ajanga tanübo parnok ana küma lemsaogo. Anogoshia parnoki iba anemaji rarar,” ta ashi.
“Asen kidanger tebilemba tamajungtem kechisa lidir liaka, ibaji takok mangutsü,” ta Rajnath-i ashi.
Kiralongrar ka dang ‘taküm tenla agütsür ka’ ta Pakistani ajaba aser Burhan Wani tepsetba ji ‘black day’ ta sangdongbaji tejashitsüka lir, ta paisa ashi.
“Burhan Wani ya kiralongrar telok, Hizbul Mujahideen nung commander ka liasü. Pa ya technology sapua amshir ka liasü aser pai social media ajanga lanurtem dang raraba osettem bena arutsü ajungshia liasü,” ta home minister-i ashi.
Rajnath-i ashiba agi, Kashmir nung longkak aitba mapang security sepaitemi kanga tazüokba nung tashi amshitsü tuyuogo, iba den külemi sepaitemi ‘pellet guns’ amshibaji mongin luden kati reprangshitsü.
Home minister-isa, “Yimtenren party ajaki Kashmir onük bentettsü atema inyakogo. Kashmir onük ya ajaki longjemer inyaktsü onük ka lir. Tensa tajungba akumtsü atema ajaki shilem agitsü nüngdaker,” ta metetdaktsü.