Kashmir nung longkak aiter 2 asü; asür ajak agi 75 jungogo

Srinagar, September 10 (Agencies): Honibarnüa south Kashmir nung security sepaitem aser longkak aitertem tsüngda raradang longkak aiter lanur ana süogo, aser ibaji züngsemabo Kashmir nung longkak aiter ajak agi nisung 75 tashi süogo.
Tanü Tukroo nung longkak aitertemi sepaitem dak long agi aon, aser sepaitemi lokti senshidaktsütsü atema tear gas kahloktsüdang nisung ka tenüng agi, Sayar Ahmad dak tekolak nung kahshi, ta police ketdangser kati ashi.
Iba tesem nungji Section 144 of CrPC ozüng benoka lir, koba ajanga nisung pezü mesüra iba dak tema adenshitsü memelar.
Ketdangserisa, Sheikh ji Rajpora nung aliba sub-district hospital-i anir ao, ajisüaka yangji aliba doctor temi pa tasü bener aru, ta ashi.
Ano Anantnag district kübok Botengoo nunga sepaitem aser longkak aitertem tsüngda raradang lanur ka tenüng agi, Yawar Bhat asü, ta ketdangserisa ashi.
Sepaitem den raradang Bhat ji injang tila ‘pellet’ agi yiru, ta paisa ashi.
Lanur anaji züngsemabo July 9 nü nungi tenzüka tang tashi nung longkak aiter ajak agi nisung 75 tashi süogo.
Tatalokba ana nungji nisung jenti yiruogo. Ano yimti tejenba aser Budgam district nunga nisung jenti yiruba osang lir, ta police ketdangserisa ashi.
Kashmir Valley nung maneni tensa mejungi lir, ta paisa shisem.
Ano tanga osang ka nung Central Reserve Police Force (CRPF)-i twitter ajanga, “Tesüiba ghonda 24 tsüngda Kashmir Valley nung tatalokba 44 nung CRPF 14 yiruogo aser CRPF gari ana raksaogo,” ta metetdaktsü.