Kashmir nung longkak aitertem dak teshinem menemba bomb amshitsü

Kannauj (Uttar Pradesh), July 08 (Agencies): Scent aser teronem menemba oset balala yangluba nüngugu company, Kannauj perfumers-i teshinem kanga menemba capsule bomb ka yanglutetogo, aser ibaji Kashmir nung longkak aita sepaitem dak long agi aonertem dak khaloktsütsü, ta osang angazüker.
Uttar Pradesh, Kannauj nung amenoka aliba Fragrance and Flavour Development Centre (FFDC) nung scientist temi capsule ka yanglutetogo, iba capsule ji apokba sülen mozü adoktsü aser nisungi metizüktettsüsa teshinem kanga menemtsü; ajisüaka iba jagi temang nungbo timtem kecha magütsütsü.
FFDC Principal director, Shakti Vinay Shukla aser FFDC Assistant Director, A.P. Singh na leniba kübok scientist temi yanglutetba bomb capsule ji Minister of state for Micro Medium and Small Industries (MSME), Giriraj Singh danga sayua liasü.
Iba dak sendakba nung Minister of State, Singh-i Defense Ministry dangi shidi ka zülua iba capsule ji Ministry of Defence indang Special Research Branch nung tendangtsü asoshi mepishiogo.
Defense Research and Development Organisation (DRDO) aser Union Ministry for Defence dang nungi temelaba meshiba sülen Capsule ji Indian Army indang hadirtem rongnung züngsemtsü, ta kasa osang ajanga metetdaktsü.