Kashmir nung party ajak senden amen

Srinagar, July 21 (Agencies): Kashmir Valley nung longkak aita sepaitem den raradang nisung 43 asüba aser nisung 3400 shi yiruba sülen Kashmir tensa reprangshia asadangtsü atema tanü Jammu & Kashmir Chief Minister, Mehbooba Mufti-i party ajak senden ka ayonga menogo.
Ajisüaka iba senden nung opposition tongti, National Conference-bo maden.
National Conference-i iba senden nung shilem magitsü, ta Bodhbar aonung sangdonga liasü.
Mehbooba menden ser agiba senden nung Deputy Chief Minister, Nirmal Singh densema minister aika den opposition Congress nungi lenirtem, independent MLA tem aser tanga yimtenren party tem nungi lenirtem aden.
July 8, 2016 nü security sepaitemi Hizbul Mujahideen Commander, Burhan Wani kahsetba sülen longkak maneni aitba tensa süngjemtsü atema telemtetba kar agitsü nükjidong nung iba senden ya ayonga kaogo.
Ano külen tanga osang ka nung, Kashmir nung aliba district pezü nung curfew agienogo, iba sülen tanü nungi school tem lapoka liasü. Ajisüaka tanüngba district 6 nungbo curfew ozüng maneni benoka lir.
Bandipora, Baramulla, Budgam aser Ganderbal district tem nungi curfew agienogo ajisüaka tanüngba dictrict tem nung Section 144 CrPC maneni benoka lir.