Kashmir nung ‘pellet’ melen mersü agi yangluba Grenades amshitsü melaogo

New Delhi, September 03 (Agencies): Jammu & Kashmir nung longkak aitertem azüoktsü atema sepaitemi ‘pellet’ amshia liasü, ajisüaka iba melen mersü nungi agizükba chemical amshitsü atema committee kati benokba sdlen tanü Union Home Minister, Rajnath Singh-i ibaji agizükogo.
Asüng Singh leniba nung party ajak nungi teshimtet lenirtemi Kashmir semdangtsü lia tanü pai Pelargonic Acid Vanillyl Amide (PAVA) amshitsü temelaba agüsüogo. Home Minister-i pellet prangpong melen Nonivamide amshitsü atema temelaba agütsüoso, ta tanü ketdangsertem osang ka ajanga metetdaktsü.
Kasa osang ajangasa,  mersü nungi agizükba chemical agi yangluba grenade 1000 Deobarnü Kashmir Valley atongtsü, ta ashi.
Singh-i August 24-25 anogotem nung Kashmir semdangba mapang pai, tarutsü nung security sepaitem nem pellet prangpong melen tanga ka agütsütsü, ta metetdakja liasü.
Ajisüaka pellet prangpong amshibaji khenyongibo menokdanger, kechiyong kangasa koda masüba tensa nungbo ibaji amshitsü, ta ketdangsertemisa ashi.
Taküm August 29, 2016 nü Home Ministry nung Joint Secretary, T V S N Prasad leniba nung züngsem 7-i akumba mongin committee kati lokti azüokdang PAVA amshitsü atema benoka liasü. Kashmir nung pellet prangpong ajanga longkak aiter nisung aika tenük pokdaktsüba sülen iba committe ya tentet.
Mersü nungi agizükba chemical amshia yangluba ‘PAVA shells’ ya lendong kangabo maket, ajisüaka mapang tatsüka atemabo nisungtem timtemdakja lokti azüoktettsü tashi lir.
‘PAVA shells’ ya tesüiba küm ka shi Lucknow nung aliba Indian Institute of Toxicology Research, Scientific and Industrial Research (CSIR) laboratory nung tendanga liasü, aser Kashmir nung tensa kanga mejungi aliba mapang ka nung PAVA tendangba maparen ya tembangogo.