Kashmir nung telungpur ka aser sepai ka asü

Srinagar, September 02 (Agencies): Tanü Srinagar nungi kilometer 50 shi pila oor Baramulla district nung ghonda teku shi kahtepdang Hizbul Mujahideen telungpur ka aser sepai ka süogo.

Telungpur aliba osang ka angazükba sülen security sepaitemi telungpur mita aoba mapang tanep 7:00 ako meta Rafiabad nung telungpur den kahtep tenzük, ta police osang ka ajanga ashi.

Telungpurtem mita aoba mapang telungpurtem jagi tama security sepaitem dak injang akahba sülen parnok tsüngda rara tenzük.

“Iba mapang nung telungpur ka aser sepai ka süogo,” ta police ketdangser kati ashi.

Telungpur sangji Soporo anasa Brath Kalan nung alir Riyaz Ahmad lir ta jangjaogo, aser pa Hizbul Mujahideen telok nungi liasü, ta paisa ashi.

Ketdangserisa, tamasabo Intelligence osang ajanga iba tesem nungji Qayoom Najar den inyaksemer, Lashkar-e-Islam (LeI) telungpur Imtiyaz Ahmad Kandoo lir, ta onok nem metetdakja liasü, ta ashi.

Najar aser Kandoo naprongla jagi Hizbul Mujahideen tongti Syed Salahuddin toktsüba sülen LeI telok kübok inyaka liasü.

Tenaprongla pua aruteter nem senpet lakh 10 agütsütsü sangdonga lir.