Kashmir nung telungpuri police asem kahset

Srinagar nung Jammu & Kashmir Chief Minister, Mehbooba Mufti-i India police tasümang asem nung naro yutsüba angur.

Srinagar, May 23 (Agencies) : Hombarnü Srinagar nung telungpuri police dak kaher ajenba mapang police asem kahsetogo. Iba mapa ya Hizbul Mujahideen teloki asütsü akok ta temulung melemi bilemer. Srinagar nung küm asem tejakdang iba ama tatalokba khen atalokogo.
Srinagar yimti tejenba nung nisung ana motorcycle nung mener arua prangpong mami aliba police ana den chitepa anener injang kahloktsü, ta police-i IANS osangbenertem dang ashi.
Item police anaji traffic kanga sashia aliba Zadibal tesem nung traffic azüoka liasü. Iba lemjem ya sürbo SKIMS mozü kidangi aoba lenmangang lir aser iba tesem nung anogo shi gari kanga mazüngi alir. Iba tesem ya yimti tiyong nungi kilometre 10 shi pilar lir.
Assistant sub-inspector Nazir Ahmed aser Head Constable Bashir Ahmed naprongla dak tekolak nung akah. Tena mozü kidangi bener ao, ajisüaka mozükidang inyakertemi tena sür ang mozüki tonga bener aru ta metetdaktsü.
Tena kahseter gondha ka majungdang, yimti tiyong nungi kilometre 5 shi pilar aliba, Tengpora tesem nung telungpurisa ano police ka kahset.
Pa kahseter telungpur jagi pai ama aliba rifle dena bener ajen, ta police ketdangser kati ashi.
Iba police sang ya yimsüsür ka ki nüka aliba mapang kahset. Pa mozü kidangi anir ao ajisüaka züpo uluraba agi mozüki tonger tatsüka lir asü, ta ketdangser jagisa ashi.
Hizbul Mujahideen telungpur teloki item lendong ana ya parnoki agütsü, ta metetdaktsüogo.
Hizbul Mujahideen telok atema otongdar Burhanuddin-i, Hombarnü atalokba lendong anaji onoki lir, ta osangbenertem dang ashi.
State nung taoba ita Mehbooba Mufti-i aniba Peoples Democratic Party aser Bharatiya Janata Party na lokteper sorkar akümba sülen ibai mezüng lendong atalokerba lir.
Kashmir tenemtsüng nung taküm mei mapang telungpuri lendong kanga agütsütsü, ta intelligence osang ajanga ashiba security ketdangsertemi metetdaktsü.
“Army, police aser agency tanga ajak kanga junga renema lir. Item kiralongrar nem onok mokokdaktsütsü, ta GOC 15 Corps nungi Satish Dua-i osangbenertem dang ashi.